कपिलवस्तु, शिवराज नगरपालिका वडा नम्बर २ मा शिक्षा र संस्कृतिको महत्त्वलाई अझ प्रगाढ बनाउन विद्यालय स्तरीय र टोल स्तरीय हाजिरी जवाफ प्रतियोगिता सफलतापूर्वक सम्पन्न भएको छ। “शिक्षा नै संस्कारको मुल मार्ग” भन्ने मुल नारासहित आयोजना गरिएको यस प्रतियोगितामा विद्यालयका विद्यार्थीहरू र स्थानीय टोल विकास संस्थाका सदस्यहरूले भाग लिएका थिए।

यस कार्यक्रमको उद्देश्य शिक्षा र संस्कारको महत्त्वलाई जनमा पुर्याउनु र विद्यार्थीहरूको क्षमता अभिवृद्धि गर्नु रहेको वडा अध्यक्ष राम बहादुर चौधरीले जानकारी दिएका छन्। वडा अध्यक्षका अनुसार, यो कार्यक्रम वडाको वार्षिक कार्यक्रम अन्तर्गत आयोजना गरिएको हो र यसमा वडामा रहेका विभिन्न विद्यालय र टोल विकास संस्थाका सदस्यहरूलाई सहभागिता गराइएको थियो।

प्रतियोगितामा वडाका ३ वटा विद्यालयहरूले भाग लिएका थिए। ती विद्यालयहरूमा संस्थागत र सामुदायिक विद्यालयहरू समावेश थिए। प्रत्येक विद्यालयका विद्यार्थीहरूले आफ्नो क्षमता र ज्ञानलाई प्रतिस्पर्धामा प्रस्तुत गरेका थिए। प्रतियोगिता विभिन्न चरणहरूमा आयोजना गरियो, जसले विद्यार्थीहरूलाई आफ्ना विचार र उत्तरहरू प्रस्तुत गर्ने अवसर प्रदान गर्यो।

कार्यक्रमको उद्घाटन गर्दै वडा अध्यक्ष राम बहादुर चौधरीले भने, “हामीले यस कार्यक्रमको आयोजना विद्यार्थीहरूको क्षमता र सोच अभिवृद्धि गर्नका लागि गरेका हौं। यसले विद्यार्थीलाइ नयाँ रचनात्मक विचार गर्नको लागि प्रेरित गर्नेछ र वडाका विद्यालयहरूको बीचमा स्वस्थ प्रतिस्पर्धा प्रवर्द्धन गर्नेछ।”

उनले थपे, “शिक्षा मात्र ज्ञानको भण्डार होइन, यसले संस्कार र सभ्यतासँग जोडिएको छ। हामी चाहन्छौं कि यस प्रकारका कार्यक्रमहरूले विद्यार्थीहरूको सम्पूर्ण विकासमा योगदान पुर्याओस् र तिनीहरूलाई समाजको जिम्मेवार सदस्यको रूपमा तयार पारोस्।”

कार्यक्रमको समापनमा सबै सहभागी विद्यार्थीहरूलाई प्रमाणपत्र र उपहार दिइयो। यो प्रतियोगिता वडामा रहेका विद्यार्थीहरूको उत्साह र जोशको स्पष्ट प्रमाण थियो, र यसले भविष्यमा शिक्षा र संस्कारको विकासमा अझ बढी पहल गर्न प्रेरणा दिने छ।