प्रगतिशील पत्रकार सङ्घले नेपाल पत्रकार महासङ्घको सदस्यताको सम्बन्धमा अझै पनि आस्थाको आधारमा भेदभाव गरिएको भन्दै त्यसको विरोध गर्ने बताएको छ ।
अध्यक्ष श्यामलाल पोखरेलको हस्ताक्षरमा २०८१ मङ्सिर १७ गते सोमबार जारी प्र्रेसविज्ञप्तिमा प्रगतिशीलले सो धारणा व्यक्त गरेको हो ।
मङ्सिर १७ गते नै बसेको केन्द्रीय समिति बैठकको निर्णयसमेत सामेल गरिएको सो विज्ञप्तिमा महासङ्घको सदस्यता सम्बन्धमा केही सकारात्मक प्रवृत्ति देखा परे पनि कपिलवस्तु, दाङ जस्ता जिल्लामा समस्या देखा परेको उल्लेख छ ।
महासङ्घको चुनावमा सहकार्यबारे सचिवालयले निर्णय गर्ने, मङ्सिर २२ गते सङ्गठनको अठारौँ स्थापना दिवस मनाउने तथा चितवनका बसन्त ढुङ्गाना र सिन्धुपाल्चोकका ज्ञानेन्द्र तिमिल्सिनालाई केन्द्रीय सदस्यमा मनोनित गरिएको निर्णय समावेश गरिएको विज्ञप्तिको पूर्ण पाठ यस्तो छ :
“प्रगतिशील पत्रकार सङ्घ, नेपालको २०८१ मङ्सिर १७ गते सम्पन्न केन्द्रीय समितिको भर्चुअल बैठकका निर्णयहरू सार्वजनिक गर्न यो प्रेसविज्ञप्ति सार्वजनिक गरिएको छ ।
१. नेपाल पत्रकार महासङ्घले आगामी मङ्सिर २८ गते तीनै तहको निर्वाचन घोषणा गर्नुका साथै कात्तिक मसान्तसम्म मतदाता नामावली सार्वजनिक गर्ने बताएको थियो तर अहिलेसम्म नामावली सार्वजनिक भइसकेको छैन । सदस्यता नामावली तयार पार्ने सन्दर्भमा कतिपय जिल्लामा केही सकारात्मक प्रवृत्ति देखा परे पनि कपिलवस्तु, दाङलगायतका जिल्लामा वैचारिक आस्थाकै आधारमा हाम्रो सङ्गठनसम्बद्ध क्रियाशील पत्रकारलाई महासङ्घको सदस्यताबाट वञ्चित गराइएको छ । यस खालको गलत प्रवृत्तिको विरोध गर्दै समस्या देखा परेका जिल्लास्तरबाट तालाबन्दी वा अदालत जाने जस्ता विभिन्न विकल्पमा जाने निर्णय गरिएको छ । सो सङ्घर्षलाई प्रदेश र केन्द्रीय समितिले अगाडि बढाउने छ ।
२. पत्रकार महासङ्घको चुनावसित सम्बन्धित सहकार्यबारे निर्णय गर्ने जिम्मा सचिवालयलाई दिइएको छ ।
३. आगामी मङ्सिर २२ गते हाम्रो सङ्गठनको अठारौँ स्थापना दिवस पर्दछ । स्थापना दिवसको कार्यक्रम केन्द्रदेखि जिल्लास्तरसम्म विविध कार्यक्रमसहित सम्पन्न गर्ने निर्णय भएको छ ।
४. केन्द्रीय समितिको वैकल्पिक सदस्यमा चितवनका बसन्त ढुङ्गाना र सिन्धुपाल्चोकका ज्ञानेन्द्र तिमिल्सिनालाई नियुक्त गरिएको छ ।”
प्रतिक्रिया
सम्बन्धित खवर
