शिवगढिका दुई युवाद्वारा बालबालिकाहरुलाई शैक्षिक सामग्री वितरण ।।

शिवराज नगरपालिका–९, शिवगढीका दुई युवाले सामुदायिक विद्यालयमा अध्ययनरत गरिब तथा जेहेन्दार विद्यार्थीहरूलाई शैक्षिक सामग्री वितरण गरेका छन् ।
पढाइको शिलशिलामा अस्ट्रेलियामा रहेका युवा इश्वर पुरी र रोजगारीको शिलशिलामा विदेशमा रहेका मनोज घर्ती मगरको पहलमा शिवगढी क्षेत्रका ७ वटा विद्यालयका १ सय ३५ जना विद्यार्थीहरूलाई झोला, कापी, पेन्सिल लगायतका सामग्री वितरण गरिएको हो ।

उनीहरूले गाउँमा रहेका विपन्न परिवारका बालबालिकालाई शिक्षामा सहयोग पुर्‍याउने उद्देश्यले यो पहल गरेका हुन् । वितरण कार्यक्रम स्थानीय विद्यालयहरूसँग समन्वय गरी  इश्वर पुरी र मनोज घर्तीमगर का बुबाहरु कर्ण बहादुर पुरी र बेगाराम घर्ती मगरको हातबाट बितरण गरी सम्पन्न गरिएको थियो ।

युवा इश्वर पुरीका अनुसार आर्थिक अभावका कारण पढाइमा असर परिरहेका विद्यार्थीहरूलाई सहयोग गर्न सके भविष्यमा उनीहरूबाट समाजले  लाभ लिन सक्नेछ । “हामीले सानो प्रयास गरेका हौँ, तर यसले विद्यार्थीहरूलाई ठूलो प्रेरणा दिन सक्छ भन्ने विश्वास लिएका छौँ,” पुरीले बताए ।

स्थानीय शिक्षक र अभिभावकहरूले युवाहरूको यो सामाजिक उत्तरदायित्वप्रति धन्यवाद दिँदै यस्ता अभियानले समाजमा सकारात्मक परिवर्तन ल्याउने बताएका छन् ।